مجزرة بحر البقر

في صباح الثامن من شهر إبريل عام 1970، شنت القوات الجوية الصهيونية هجوما همجيا وحشيا على مدرسة "بحر البقر"، أسفر عن تدمير كامل للمبنى، ومقتل 30 تلميذا في زهرة الطفولة، وإصابة قرابة الخمسين.

ومين ينسى؟؟

ومين ممكن ف يوم ينسى؟؟

دماء ع الأرض زي السيل..

وظلم وويل..

وطفل بريء بيكتب درسه ف الكراس..

وقبل ما تضرب الأجراس..

بتنهي حياته طيارة.. بدون إحساس..

بترمي النار على مدرسته تهدمها..

وتقتل بسمة..

تدفنها..

وتردمها..

ولا تنزل دموع منها..

ولا الأشلاء بتألمها..

صغار ماتوا..

وتجري الناس..

تدوّر ف الحطام والهدم..

على همسة..

على بسمة..

صاحبها لسة فيه الروح..

ويكتر في بلادنا النوح..

وينزل دمعنا كالسيل..

على أطفال ما ليهم ذنب..

***

ف ليل الظلم..

بتعوي ديابة غدارة..

وتيجي ف شكل طيارة..

تهد الحلم..

وتنسف فرحة ف عنينا

وترسم خوف حوالينا..

يزيد الهم..

وبعد ده كله قولوا "سلام"!!

سلامكوا دهو خيال.. أحلام..

مجرد وهم..

تحطوا ايديكوا ف إدين مين؟..

ف إيد قاتل، خسيس، ولعين..

ملاها الدم؟..

مع الخاين مفيش غير البارود والنار..

ولو متنا نموت أحرار..

ما نرضى الظلم..

ده انا "بحر البقر" ما نستش..

ودم الغدر ما بيبردش..

ولا بيِقْدَم.

رابط القصيدة على صفحتي هـــنـــا