أحمد الجرواني: بالعامية المصرية

‏إظهار الرسائل ذات التسميات بالعامية المصرية. إظهار كافة الرسائل

السبت، 11 أبريل 2020

باللغة العربية 3:32 م

حوار بين العقل والقلب

العقل:

غَدَرَت بقلبك عينُها الحوراءُ // لا تعجبن فكلهن سواءُ

لا فرق بين رقيقة وغليظة // فجميعهن قلوبهن خواءُ

وجميعهن لعابثات بالهوى // تلهو بقلبك، صاح، كيف تشاءُ

فعذابنا من بُعدهن لراحة // ودواؤنا في قربهن لداءُ

أحمد الجرواني 0

بالعامية المصرية 2:56 م

حادثة قطار

في صباح يوم 27 فبراير/شباط 2019؛ وقع حادث قطار محطة مصر في القاهرة، مصر. أسفر الحادث عن وفاة 21 شخصًا وإصابة 52 آخرين.

أحمد الجرواني 0

الثلاثاء، 31 مارس 2020

بالعامية المصرية 1:49 ص

أنا حد ضعيف

الكثير منا يتظاهر بالقوة والصلابة..

أو يجتهد في أن يبدو كذلك..

حتى يظنه الناس لا يتألم ولا يكل..

حتى يظنوه خارقا أو جبارا..

وهنا قد يصل إلى نقطة انهيار، يحتاج أن يصرخ فيها قائلا "أنا حد ضعيف"!

أنا مش جبار

أنا مش مخلوق من صخر ونار..

ولا عمري قهرت أي وحوش..

ولا عمري في يوم حطمت تتار

ولا قبضة إيدي تهد جبال..

ولا نظرة عيني تطق شرار..

أنا جايز بظهر إني عنيف..

أو صلد. لا عمري عرفت الخوف..

لكن ده بس قناع.. تزييف

أنا حد ضعيف..

جواية البرد في عز الصيف..

محتاج ((إنساااان))

محتاج للحضن اللي يحسسني بكل أمان..

محتاج ارجع طفل صغير..

بيعامله الكل بكل حنان..

محتاج اصرخ.. محتاج ابكي..

محتاج انا احس اني انسان..

محتاج انا قلب كبير طيب..

لجروحي يداوي ويطيب..

محتاج للإيد اللي تطبطب..

محتاج احكيله.. وما يكذّب..

ولا اخاف منه ولا اكون مكسوف..

ولا ييجي في باله ان ده تزييف..

واصرخ واقول

أنا حد ضعيف

رابط القصيدة على صفحتي هـــــنـــــا

أحمد الجرواني 0

بالعامية المصرية 1:34 ص

ليه يا غزال

هوة الغزال..

علشان ربي اداه الجمال..

وإن قلبي لحبه مال..

يعمل كده يسوق الدلال؟؟!

******

طب ليه بيقتل فرحتي؟!

طب ليه يعذب مهجتي؟!

يبعد، ماتنشف دمعتي!

يحرمني حتى م السؤال!

*******

فاكرني هنساه بالبعاد

ولا بقساوة، وبعناد

ده حبه ده حياة الفؤاد

هوة المنى وكل الآمال

******

لو بينا حتى ألف ميل

أنا عمري مالغيره هاميل

ده حبه خلاني عليل

ودوايه حبه والوصال

********

أملي أعيش وافضل معاك

دنا مستحيل انسى هواك

أو لحظة واحدة اعشق سواك

لو حتى مرة ف الخيال

رابط القصيدة على صفحتي

أحمد الجرواني 0

بالعامية المصرية 1:21 ص

ما بينا حدود

كثرة الشقاق تصنع المسافات وتبني الحدود بين الناس..

حتى الإخوة والأحبة..

وإذا زاد الشقاق، زادت المسافات..

حتى تصير هذه المسافات كحدود الدول المعادية أو كالسدود العظيمة..

ما بينا حدود..

مسافة كبيرة مليانة جبال وسدود..

مع الأيام مبتقلش..

لكن بتزيد..

وكل لحظة تبعدنا..

وتبني فيها سد جديد..

كفاية حرام..

انا مقدرش اعيش اكتر مع الأحلام..

مع الأوهام..

وكل لحظة بتعدي تزيدني الام..

مع الايام..

لو انت حقيقي حبتني..

ف ليه عنك بتبعدني..

و م الأحزان تزودني..

وليه تبني مابينا سدود..

وليه توجد ما بينا حدود..

خلاص.. راح ييجي يوم فجأة يقولوا ده مات..

من الأحزان..

من الآهة اللي دايما ساكنة جواية..

ولا بتبان..

من الدمعة اللي مكتومة..

وضحكة بدالها مرسومة..

وآلامي اللي ترسملي..

دروب بمشيها مشؤومة..

من القلب اللي يحصد شوك.. وزرعه ورود..

ويتقال له -برغم الحب-: بينا سدود

*****

رابط القصيدة على صفحتي هـــنـــا

أحمد الجرواني 0

السبت، 28 مارس 2020

بالعامية المصرية 11:11 م

قلبي بيناديك

رسم في خياله صورة لحبيبه..

ثم راح يدأب في البحث عنه..

ولأن تلك الصورة لا تتكرر ولا تتشابه..

فقد كان البحث عنها شاقا جدا ومؤلما جدا..

ولكن كل هذه المشقة البالغة، وكل هذا الألم الشديد، زالا بلمسة من يد محبوبه، وبهمسة من صوته العذب.

قلبي تايه ف الشوارع بيناديكْ..

يجري ويدور عليك..

كله لهفة يشوف عيونك وابتسامتك..

وبإيديك تمسح دموعه..

تقول "سلامتك"..

كله لهفة يضم إيدك بين إيديه..

يملى من سحرك عنيه..

وبحنان تهمس له:

"اتأخرت ليه؟"

أصلي تايه ف الشوارع من زمان..

كنت ادور ع الأمان..

وعن الحنان..

وانت عارف إن كل الدنيا زحمة..

وان كل دروبها ضلمة..

والبشر قاسية وظالمة

والقلوب مش فيها رحمة..

بس في الآخر لقيتك..

بعد مااتعذبت ياما عشان اجيلك..

أصل انا معرفش ألقى منين سبيلك..

وانت ليه مبعتليش مرة دليلك؟؟

بابتسامتك..

كنت بتنور طريقي..

ولا صوتك..

كان لي ف الغربة صديقي..

بس تعرف

قلبي شافك قبل ماتشوفك عيوني..

كنت جواه طول سنيني..

كان بيسهر يوصفك طول الليالي..

كنت اقوله: كنت خالي..

ليه معاك تشغل لي بالي؟؟

ليه أبات أسهر وافكر..

واقضي كل حياتي ادور..

واشتياقي ليه بيكبر..

قاللي: اصبر..

لو تشوفه..

عن بعاده يوم ماتقدر.

رحت ادور..

عن عيونك.. اللي أجمل م الخيال..

وابتسامتك.. اللي ما تخطر ببال..

واما شفتك.. قلبي داب من سحر عينك وابتسامتك..

والعذاب من قلبي غاب..

لما جيت تمسح دموعي تقول "سلامتك".

**********

رابط القصيدة على صفحتي هـــنـــا

أحمد الجرواني 0

بالعامية المصرية 11:06 م

مفيش حاجة اسمها أحلام

يخيل إلي أحيانا كثيرة أن الأحلام وُجدت لكيلا تتحقق!!

تتمنى شيئا..

وتدأب في الحصول عليه، ولا تألو جهدا في الوصول إليه..

ثم لا يتحقق..

أو يضيع هباء منثورا..

فتنزوي في ركن مظلم..

باكيا..

قائلا لنفسك: "مفيش حاجة اسمها أحلام"

ثواني البعد بتعدي.. كأنها عمر..

وأقاسي البعد ده لوحدي.. وادوق المر..

ودمعي يسيل على خدي.. منين الصبر؟؟

وليه أحلامي تتبدد.. وتبقى سراب

وليه الجرح يتجدد.. واعيش ف عذاب

ولما احلم على قدي.. ويبقى الحلم ده صغير..

وببذل منتهى جهدي مفيش حاجة بتتغير.

***

خلاص اصحى..

مفيش حاجة اسمها أحلام..

كفاية حرام..

بلاش أوهام.

ولا تصدق..

بإن في يوم هييجي الحلم يتحقق..

ده كله كلام..

كلام بتعيشه ف خيالك..

بإن الفرحة جيالك..

هتمسح دمعة فوق خدك..

وتمحي الحزن من بالك.

***

راح اكتم آهتي جواية.. ومش هشكي..

وهرسم بسمة كذابة.. ومش هحكي..

وبس لنفسي انا هشكي..

واقول واحكي..

ومش هخجل معاها ابكي.

**********

رابط القصيدة على صفحتي هـــنــــا

أحمد الجرواني 0

بالعامية المصرية 11:01 م

ليه الألم!

ظنوه جلدًا؛ لأنه لا يظهر شكاته لأحد..

ظنوه سعيدًا؛ لأنه بسمته لا تفارق شفتيه..

وحينما فاض به الكيل، وبث حزنه لمن ظنه حبيبًا..

فاجأه حبيبُه بنظرات استنكار، وكلمات تعنيف لاذعات..

قائلا له: "وليه الألم"

ليه الألم؟!

وانت اللي قلبك طول حياته بيتظلم!

ليه الألم؟

وانت اللي دايما تدبحك "جرة قلم"!

جرة قلم بتسقطك..

وبتسجنك..

وتعذبك..

وبرة أرضك تطردك..

والآخر انت المتهَم..

فقولي ليه..

ليه الألم؟!

***

ليه الألم.. وما حد حس بأنتك..

ولا مرة شاركك محنتك..

وحتى لو فاض بيك ف مَرة..

وقلتله عن حاجة مُرة في دنيتك..

تبقى نهاية صُحبتك..

وتبقى إنت الجاني..

واللي بطبعه أناني..

وبالخديعة والنفاق راح تتوصم..

فقولي ليه..

ليه الألم؟؟!!!!

***

ليه الألم..

وكل حلم بتحلمه بيصبح سراب..

وكل يوم بيزيد نصيبك في العذاب..

والآهة دايمة جوة قلبك تدبحك..

حتى القريب قبل الغريب بيجرّحك..

وان مرة بانت فرحتك..

يجري يدوس ع الجرح يسمع صرختك

والحب قصة.. وبآهاتك تبتدي..

وبعذابك تتختم..

فقولي ليه..

ليه الألم؟؟!

*****

رابط القصيدة على صفحتي هـــنـــا

أحمد الجرواني 0

بالعامية المصرية 10:52 م

حلم وبس

على الرغم من كل ما يمر به المرء من مشاق وعذاب في حياته، إلا أنه يحاول أن يفرح مخففا عن نفسه..

لكن تصادمه الدنيا بصوارفها وصوارمها..

فيشعر أن الحزن قدره الذي لا مفر منه!

أحيانا بتحاول تفرح..

وانك تنسى كل آلامك..

وتطنش.. وتعيش أحلامك..

لكن قدرك..

اللي بتعيشه في أيامك:

إن الحزن ده حاجة في ذاتك..

زي ملامحك..

زي جوارحك..

يفضل جرحك..

يمسح فرحك..

يفضل حلمك حلم وبس..

ما بيتحقق، ولا يتحس..

******

رابط القصيدة على صفحتي هـــنـــا

أحمد الجرواني 0

بالعامية المصرية 10:49 م

مفيش حاجة

نضيق أحيانا بهمومنا، فنبحث عن أذن مصغية لنبث فيها شجانا..

لكن نفاجأ بألا أحد يعي قدر الألم الذي يعتصر كياننا..

فنؤثر السكوت..

ونتظاهر بالسعادة، على الرغم من دموع الألم المرسومة على وجناتنا!

ما بين "عادي" و"مفيش حاجة"

كلام ببقاله محتاجة

لكن مش قادرة اقول حاجة

وانا جواية 100 حاجة

***

ولو مرة أقول حاجة

بتتفسر كذا حاجة

مفيش منهم ولا حاجة

من اللي كنت قصداهم..

فـ"عادي" "انسى" "مفيش حاجة"

***

وليه أصلا أقول حاجة وأتكلم؟؟!!

مَ انا ببقى قصاد عينهم وبتألم

وماالقى حد بيواسي ولا يسلم!!

فليه أشكي؟ وليه أبكي واتألم؟؟!!

***

وبضحك.. والألم جواية يتكلم

وينزل دمعي غصبن عني..

يحفر خط ويعلّم

ولو سألوا، أقول "أبدا. مفيش حاجة"

رابط القصيدة على صفحتي هـــنــــا

أحمد الجرواني 0

بالعامية المصرية 10:41 م

هــســيــبــك

كثرة الشقاق تقتل الحب!

هكذا علمتني الحياة.

ومن يطأ كرامته من أجل حبه، سيجيئ اليوم الذي تثور فيه كرامته..

وستكون حينها كالبركان الهائل الثائر..

وحينها ستدمر كل شيء يقف في طريقها!

هسيبِك وامشي مش راجع

ولا هندم، ولا عن كرهي هتراجع

وبردو مش أنا البايع

منا حبيت

وياما وفيت

وروحي اديت

وعقلي اديت

وقلبي اديت

وقولتيلي كلام جارح.. ولا رديت

خاصمتيني.. وانا إيد السماح مديت

وعادتك: تبتدي بالجرح

وعادتي: أبتدي بالصلح

وكان قلبي معاكي كبير

لكن معرفتش اني لعبة في إيديكي

مجرد لعبة سايباها تسليكي

ولما تملّي من لعبك.. بترميها

وبعد ثواني تنسيها

كلامك لية عن حبك.. مجرد كدب

ولا كان جاي من قلبك.. وفين القلب؟!!!

هسيبك

أيوة راح اسيبك

وهدعيلك

يكون الحزن ده نصيبك

ولا فرحة تقرب لحظة وتصيبك

أنا هسيبك.

*********

رابط القصيدة على صفحتي هـــنـــا

أحمد الجرواني 0

آخر المواضيع

السبت، 11 أبريل 2020

حوار بين العقل والقلب

حادثة قطار

الثلاثاء، 31 مارس 2020

أنا حد ضعيف

ليه يا غزال

ما بينا حدود

السبت، 28 مارس 2020

قلبي بيناديك

مفيش حاجة اسمها أحلام

ليه الألم!

حلم وبس

مفيش حاجة

هــســيــبــك

مشاركة مميزة

العنكبوت النونو

نموذج الاتصال

تواصل معنا

ويكيبيديا

ابحث في المدونة

الإبلاغ عن إساءة الاستخدام

القناة الشخصية

أنقر لمتابعتنا

فيسبوك

التسميات

التسميات

نموذج الاتصال