أنا والنجمة

ف ليلة من ليالي السهد *** سهرت بناجي نجماية

وبشكيلها الظنون والوجد *** وبشكيها اللي جوايه

"حبيبتي يا نجمة مش دارية *** ولا حسة بعذاب قلبي"

كأني بسمع النجمة *** بتسألني: "انت بتخبي؟"

جاوبت وقلت "إن الحب *** يا نجماية ميتخباش..

..مبتشفشي الهوى مني *** هيتكلم يقول عني..

..يقول عن كل إحساسي *** ويشكي من حبيب قاسي"

كأني النجمة بتقوللي: *** "حبيبتك دية أوصفها..

..وقوللي عن ملامحها *** ويمكن بس أعرفها"

جاوبت وقلت: "دي حبيبتي *** كأنها جيه م الجنة..

.. ومين يعرف في يوم يوصف *** حورية جية م الجنة..

..جمال الدنيا ف عنيها *** وسحر الكون ف رمشتها..

بدوب من لمسة بإيديها *** وتسحر قلبي خطوتها..

حياتي كلها فداها *** وبتمنى الحياة معاها"

كأني بسمع النجمة *** تقوللي: "حياتها بردو فداك..

وهيه بردو بتحبك *** وتتمنى الحياة وياك"

فاجئني ردها ليه *** ندهت وقلت: "يا نجمة"

لقيتها حبيبتي جمبيه *** وبتقوللي: (أنا النجمة)

رابط القصيدة على صفحتي هـــنـــا