وجدت هذه القصيدة الساخرة بين طيات أحد كشاكيلي..
كنت قد كتبتها وأنا في الصف الثالث
الثانوي..
(كانت أياااااااااااام)
رحلة البحث عن الأحلام
رحت أدور ع الأحلام
قمت نزلت للفكهاني //
قلت: انا عايز حلم تمام
بصّلي بصة وقاللي: يا واد //
كنت كويس من أيام
قلت: يا عم عطاالله افهمني //
دانا بدور ع الأحلام
قاللي: روح لفرارجي الغبرة //
عمك (سيد) ده قدام
قمت جريت على عم السيد //
ولحقته ف ثواني قوام
قلت: الحقني يا عم السيد //
شوفلي حلم ويبقى تمام
قاللي: بتقول إيه يا روح امك //
يادي النحس ف دي الأيام
هوة انا مش هخلص يوم أبدا //
من واحد مسطول بينام
واحد مرة يقوللي اديني //
فرخة يتيمة للأيتام
والتاني يقوللي أنا عايز //
ديك بيكاكي من فيتنام
ولا أفندي جاي يقوللي //
عاوز وزة... ولا حمام
بس يكون مقصوف الرقبة //
وودانه طالعة لقدام
قلت انا أحسن أخلع واجري //
رحت بسرعة لعم (إمام)
راجل مجدع وبتاع كله //
يصلح راديو... أو حمّام
قلت: انا عايز حلم يا ريس //
بس يكون أجدع الَاحلام
بص شوية وقاللي: استنى //
عندي حلم بس تمام
دخل ايده جوة ف جيبه //
واداني حبة برشام
قاللي: خد دية وادعيلي //
وهتبقى اجدع من (فانتام)
رحت مبرّق، قلت: يا ريس //
انت تتاجر في البرشام
الحقوا يا اهل الحارة وشوفوا //
اللي بيحصل دي الأيام
هاتوا النجدة تيجي وتقبض //
ع اللي يتاجر في البرشام
قاللي: يا واد يا ابن الشرنوبي //
عايز تفضح الاسطى (امام)
هنا وادّاني كف وبكس //
طوخ.. طاخ... حاسب يا (امام)
ضرب × ضرب لساعتين واكتر //
والشلوت كان مسك ختام
فجأة لقيت نفسي بتدحرج //
من ع الكنبة وعندي زكام
قال ايه كنت نايم عريان //
ودهو حلم من الأحلام
رابط القصيدة على صفحتي هـــنـــا
ليست هناك تعليقات:
إرسال تعليق